Еліміздің энергетика саласындағы жаңғырудан Ленгір қаласындағы нақты жұмыстарға дейін
Энергетика – кез келген мемлекеттің әлеуметтік-экономикалық дамуының негізгі тіректерінің бірі. Ел экономикасының тұрақты өсуі, өндіріс орындарының үздіксіз жұмыс істеуі, халықтың тұрмыс сапасының артуы, қауіпсіздік пен жайлы өмір сүру деңгейі ең алдымен энергетика саласының дамуымен тікелей байланысты. Сондықтан Қазақстанда соңғы жылдары энергетикалық инфрақұрылымды жаңғыртуға, электр желілерін жаңалауға, елді мекендерді сапалы жарықпен қамтамасыз етуге ерекше назар аударылып келеді.
Мемлекет басшысы халықтың өмір сүру сапасын арттыру жөніндегі міндеттерді айқындап, инфрақұрылымды дамытуға, елді мекендердің инженерлік жүйелерін жаңғыртуға және тұрғындардың тұрмысына қолайлы жағдай жасауға басымдық беріп келеді. Бұл міндеттерді жүзеге асыру барысында республиканың барлық өңірлерінде нақты жұмыстар атқарылып, ауылдар мен қалалардың келбеті жаңарып келеді.
Көшелерді жарықтандыру – жай ғана шам орнату емес. Бұл – қоғамдық қауіпсіздікті күшейту, тұрғындардың өмір сапасын арттыру, жол-көлік оқиғаларының алдын алу, қылмыстың төмендеуіне ықпал ету және кешкі уақытта тұрғындардың еркін қозғалуына мүмкіндік жасау.
Түнгі жарық ең алдымен балалардың, жастардың, қарттардың және әйелдердің қауіпсіздігі үшін аса маңызды. Жарықтандырылған көшелерде тұрғындар кешкі мезгілде еш кедергісіз жүріп, балалар еркін ойнай алады. Сонымен қатар коммуналдық қызметтердің жұмысын ұйымдастыруға, төтенше жағдайлардың алдын алуға және қаланың эстетикалық келбетін жақсартуға оң әсер етеді.
Энергетика саласының дамуы тек электр энергиясын өндірумен ғана шектелмейді. Оның басты мақсаты – халықтың күнделікті өміріне жайлылық әкелу. Сондықтан бүгінде еліміздің барлық өңірлерінде сыртқы жарықтандыру жүйелерін жаңғырту жұмыстары кезең-кезеңімен жүзеге асырылып келеді.
Бұл бағыттағы жұмыстар Түркістан облысында да қарқын алған. Өңірде әлеуметтік инфрақұрылымды дамыту, инженерлік желілерді жаңарту, көше жарығын көбейту бағытында жүйелі жұмыстар атқарылуда.
Түркістан облысының табиғаты көркем әрі туристік әлеуеті жоғары Төлеби ауданы да бұл игі өзгерістерден шет қалып отырған жоқ. Соңғы жылдары аудан көлемінде жол жөндеу, ауызсу, электр желілері, газдандыру, абаттандыру және көше жарығын орнату бағытында көптеген жобалар іске асырылып келеді.
Төлеби ауданының орталығы саналатын Ленгір қаласы бүгінде заман талабына сай дамып келе жатқан шаһарлардың бірі. Қалада тұрғындардың өмір сүру сапасын арттыруға бағытталған инфрақұрылымдық жобалар тұрақты жүзеге асырылуда. Әсіресе халықпен кері байланысты күшейтіп, тұрғындардың өтініштері негізінде нақты мәселелерді шешуге ерекше көңіл бөлінуде.
«Халық үніне құлақ асатын мемлекет» қағидаты бүгінде жергілікті басқару жүйесінде нақты көрініс тауып келеді. Ленгір қаласында да тұрғындардың ұсыныстары мен өтініштері кезең-кезеңімен орындалып, көптен бері көтеріліп келген мәселелер өз шешімін табуда.
Соның жарқын мысалының бірі – көшелерді түнгі жарықтандыру жұмыстары.
Қала тұрғындарының өтініші негізінде Арзымбетов және Шығыс көшелерінің ішкі бөліктеріне жергілікті бюджет қаражаты есебінен жаңа түнгі жарық шамдары орнатылды. Бұл жұмыстардың басты мақсаты – тұрғындардың қауіпсіздігін арттыру, кешкі және түнгі уақытта көшелердің жарық болуын қамтамасыз ету, тұрғындарға қолайлы орта қалыптастыру.
Жаңадан орнатылған жарық шамдары аталған көшелердің тұрғындары үшін үлкен қуаныш болды. Бұрын қараңғы болатын учаскелер бүгінде толық жарықтандырылып, тұрғындардың жүріп-тұруына қолайлы жағдай жасалды.
Тұрғындардың өтінішімен шешілген маңызды мәселелердің тағы бірі – Ленгір қаласындағы Жамбыл көшесінің жарықтандырылуы.
Жамбыл көшесінің тұрғындары қала әкімінің жеке қабылдауында бірнеше рет көшеге түнгі жарық шамдарын орнату жөнінде өтініш білдірген болатын. Азаматтардың ұсынысы назардан тыс қалмай, Ленгір қаласы әкімдігі жергілікті бюджет есебінен көшеге заманауи жарық шамдарын орнатты.
Бүгінде Жамбыл көшесінде кешкі уақытта жарық толық қамтамасыз етіліп, тұрғындардың қауіпсіз жүріп-тұруына барлық жағдай жасалған.
Осындай оң өзгерістер Ақмаржан көшесінде де жүзеге асырылды.
Бұл көшенің тұрғындары да қала әкімінің қабылдауында бірнеше мәрте көшені жарықтандыру мәселесін көтерген еді. Халықтың өтініші назарға алынып, жергілікті бюджет қаражаты есебінен Ақмаржан көшесінің бір бөлігіне түнгі жарық шамдары орнатылды.
Бұл жұмыстар ең алдымен тұрғындардың қауіпсіздігін қамтамасыз етуге, балалар мен жастардың, қарттардың кешкі уақытта еркін қозғалуына және жалпы қала тұрғындарының өмір сүру сапасын жақсартуға бағытталды.
Көшелердің жарықтандырылуы тұрғындардың көңілінен шығып, халық пен жергілікті билік арасындағы өзара сенімнің нығая түскенін көрсетті.
Ленгір қаласында тұрғындардың ұсыныстары мен өтініштері әрдайым назарда. Қала әкімдігі халықпен тұрақты байланыс орнатып, көтерілген мәселелерді кезең-кезеңімен шешу жұмыстарын жалғастырып келеді. Мұндай жұмыстар қаланың көркін арттырып қана қоймай, тұрғындардың жайлы әрі қауіпсіз өмір сүруіне нақты мүмкіндік береді.
Жарық – өркениеттің белгісі. Жарықтандырылған көше – қауіпсіздік, тәртіп және тұрғындарға деген жанашырлықтың көрінісі. Сондықтан Ленгір қаласында жүзеге асырылып жатқан әрбір инфрақұрылымдық жоба халықтың әл-ауқатын арттыруға бағытталған нақты қадам болып табылады.
Алдағы уақытта да тұрғындардың ұсыныстары негізінде жаңа көшелерге жарық шамдарын орнату, инженерлік инфрақұрылымды жаңарту және қаланы абаттандыру жұмыстары жалғасын тауып, Ленгірдің көркі мен тұрғындардың тұрмыс сапасы одан әрі жақсара беретіні сөзсіз.